Ang pag-ila sa katukma dili kanunay sayon. Ania ang pipila ka giya gikan sa mga eksperto aron motabang nimo sa pagdeterminar kon ang rekord motukma ba sa usa ka katigulangan o dili:
- Pangutan-a ang imong kaugalingon, “Unsa ka maayo ang tinubdan motukma sa importanteng mga petsa, mga lugar, ug mga relasyon nga nasulod na sa Family Tree?”
- Pangutan-a ang imong kaugalingon, “Aduna bay igong impormasyon sa paghukom nga ang rekord ug ang Family Tree naghulagway sa samang tawo?” Pipila sa mga rekord sa bunyag, pananglitan, nakasulat ang ngalan sa inahan o amahan apan walay laing importanteng impormasyon, sama sa edad o petsa sa pagkatawo. Samtang ang ngalan importante, dili gayod maayong ideya nga mohukom nga ang tinubdan kabahin sa piho nga tawo sa Family Tree nga nagbase lamang sa ngalan.
- Pangutan-a ang imong kaugalingon, “Aduna bay bisan unsang dagkong kaduha-duhaan?” Pananglitan, ikonsiderar ang sitwasyon diin ang kadaghanan sa mga detalye sa rekord morag tukma sa Family Tree—gawas lang sa tuig sa pagkatawo, diin deperensya og 15 ka tuig. Niana nga sitwasyon, ang rekord mahimong sa usa ka ig-agaw.
- Pangutan-a ang imong kaugalingon, “Unsa ka masaligan ang rekord?” Sa kinatibuk-an, ang usa ka makasaysayanon nga rekord nga duol sa panghitabo mao ang mas masaligan. Pananglitan, ang usa ka rekord sa pagkatawo mas masaligan alang sa impormasyon sa pagkatawo kaysa rekord sa pagkamatay nga mahimong apil lamang sa impormasyon sa pagka-tawo.
Sa kataposan, ibutang sa hunahuna nga ang mga sayop mahimong mas komon sa piho nga mga matang sa mga rekord kaysa uban. Pananglitan, usa ka tig-census mahimong magsulat sa mga ngalan nga wala gani mangutana kon unsa ang eksaktong panitik niini. O ang edad sa tawo mahimong gibanabana lang.
Sa sertipiko sa pagkatawo, sa kalainan, ikaw makasalig nga ang maong mga detalye mas masaligan.