Ko e taumuʻa fakalūkufua ʻo e Fuʻu ʻAkau Fakafāmilí ke tokoniʻi koe ke ke ʻiloʻi ho fāmilí, pea ke ke ʻiloʻi foki mo ha kiʻi meʻa siʻi fekauʻaki mo koe.
- ʻOku kehe ʻa e Fuʻu ʻAkau Fakafāmilí mei he ngaahi uepisaiti tohi hohoko ʻokú na faitataú, he ko ha fuʻu ʻakau pē ia ʻe taha, ʻoku ʻatā ki he kakaí, ʻa ia kuo fakafehokotaki fakataha ʻi he ngaahi fāmilí, kae ʻikai ko ha feituʻu ʻokú ne fakaʻatā pē ʻa kinautolu ʻoku nau fakaʻaongaʻí ke nau faʻu mo puleʻi pē ʻenau ngaahi fuʻu ʻakau fakafāmilí. ʻOku ʻuhinga ʻa e faikehekehe ko ʻení, ʻoku ngāue fakataha ʻa e tokotaha kotoa pē ʻi he fakamatala tatau, ʻo lava ai ke fakafehokotaki ʻa e mēmipa kotoa pē ʻi he faʻahinga ʻo e tangatá.
- ʻOku fakafehoanaki ʻe he Fuʻu ʻAkau Fakafāmilí ʻa e ngaahi lekōtí mo e ngaahi maʻuʻanga fakamatalá ke lava ʻo tokoniʻi koe ke fakaleleiʻi e ngaahi lekooti ʻoku fehalaaki pe ʻasi tuʻo lahí. ʻOkú ne toe ʻomi foki ha ʻū meʻangāue ki he feʻaveʻaki ʻo e pōpoakí mo e fengāueʻakí, pea pehē foki ki ha tokoni mataotao ʻi he telefoní, ke tokoni atu ʻi hono fakaleleiʻi e ngaahi fehālākí.
- ʻOku ngāue ʻaki ʻe he Fuʻu ʻAkau Fakafāmilí e tauhiʻanga fakamatala lahi ʻa e FamilySearch ke ʻoatu ha ngaahi tokoni fakalekooti. ʻOku faingofua ange heni ke fakafehokotaki koe mo hoʻo ngaahi kuí ki he ngaahi toʻu tangata kimuʻá.
- ʻE lava ke tokoni ʻa e konga ki he Ngaahi Manatu Melié ke ohi ha ngaahi fehokotaki loloto ange ki he ngaahi kuí. ʻOkú ne ʻomi ha feituʻu te ke lava ʻo tauhi mo vahevahe ai e ʻū taá mo e ngaahi hisitōliá.
- ʻOku mau fie maʻu ʻa e Fuʻu ʻAkau Fakafāmilí ke lava ʻo maʻu ʻe he tokolahi taha ʻo e kakai ʻe ala lavá. Te ke lava ʻo mamataʻi ia ʻi ha ngaahi founga kehekehe, kau ai ʻa e ngaahi meʻangāue toʻotoʻó, mo e polokalama Fuʻu ʻAkau Fakafāmilí, mo e Ngaahi Manatu Melié, pe ʻi he ngaahi feituʻu ʻoku ʻikai sai ai e ʻinitanetí, mo e Fuʻu ʻAkau Fakafāmili Laití.
Ko ʻemau fakaʻamú, ke lava ke tau ngāue fakataha ʻo fakafou ʻi he Fuʻu ʻAkau Fakafāmilí, ke faʻu ʻa e ʻakau fakafāmili lelei taha maʻá e kakai ʻi he māmaní pea fakaʻatā e kau mēmipa ʻo e fāmilí ke nau fakafehokotaki fakatouʻosi ʻi he kuohilí mo e lolotongá foki.
Ke ʻilo lahi ange fekauʻaki mo e FamilySearch, vakai ki he FamilySearch.org/about.
Ngaahi fakamatala fekauʻakí
Te u ʻave fēfē ha pōpoaki ki ha taha naʻe tokoni ki he Fuʻu ʻAkau Fakafāmilí pe Ngaahi Manatu Melié?
Te u fakaʻaongaʻi fēfē e ngaahi manatu melie ʻa e FamilySearch ke fakatolonga e ngaahi talanoa ki he moʻui ʻa ʻeku ngaahi kuí?